 Mehriban və bağışlayan Allahın adı ilə!
Əziz müsəlman bacı və qardaşlar!
Rəcəb
ayının 27-də, hicrətdən 13 il öncə – Allahın elçisi Həzrət Muhəmməd ibn
Abdullaha (s) peyğəmbərliyin verilməsi günü – Məb’əs günüdür. Bu gün
bəşəriyyətin həyatında ən əsaslı və əhəmiyyətli dönüş baş vermişdir.
Bəşəriyyət Qiyamətdən öncəki axırıncı mərhələsinə – besət dövrünə qədəm
qoymuşdur.
Əziz Rəbbimiz Öz sonsuz rəhmətilə Həzrət Rəsuli-Əkrəmi
(s) peyğəmbərliyə məbus etdikdə, bəndələrinin gözəl, nəcib durumda
olmasını istəmişdir. «Allah Təala məni üstün əxlaqları tamamlamaq üçün göndərmişdir» - əziz Peyğəmbərimiz (s) öz mübarək missiyasını bizlərə belə çatdırır.
Böyük
İslam Peyğəmbəri (s) insanları xülyalar ardınca deyil, öz kamillik
hədəfinə doğru getməyə dəvət etmiş və bu işdə Uca Yaradanan göstərdiyi
mübarək yola sadiqlik nümayiş etdirməyə çağırmışdır: «Ey Allahın
bəndələri! Sizlər xəstə, bütün aləmlərin Yaradanı isə həkim kimidir.
Xəstənin xeyri öz istəklərinə yox, həkimin tədbirlərinə əməl etməkdir.
Büna görə nicat tapmaq üçün Allahın əmrinə təslim olun».
Mübarək
dinimiz əxlaq mövzusunu daim insanın yadına salır və bu məsələdə dəqiq,
ardıcıl, ixlaslı yanaşmanı tövsiyə edir. Mə’sumlardan (ə) nəql edirlər:
«Allah-Təala öz Peyğəmbərini (s) ali əxlaqla səciyyələndirmişdir.
Siz də özünüzü bu əxlaq normaları ilə sınayın və əgər malik olsanız,
Allaha şükr ediniz və onların çoxalmasına çalışınız: 1) yə’qin; 2)
qənaət; 3) səbr; 4) şükr; 5) rza (razılıq) hissinə malik olmaq; 6)
xoşüzlülük; 7) səxavət; 8) qeyrət; 9) şücaət; 10) alicənablıq, mərdlik».
Allahın
son Elçisi (s) öz ümmətinın daim düzgün yolda olmasını istəmiş, yoldan
sapmamaq üçün dəqiq və mübarək reseptlər təqdim etmişdir. Burada ən
ümumi, eyni zamanda dərin əxlaqi göstərişlər var: «İnsanın ən
e’tibarlı işi 3 xüsusiyyətə malik olan iş olur: 1. Bütün hallarda
Allahı yaddan çıxarmamaq; 2. İnsaflı olmaq (özünün zərərinə olmuş olsa
belə); 3. Din qardaşı ilə öz malını bölmək».
Burada pis aqibət
seçənləri hər zaman çəkindirmək var: «İnsanların ən pisi axirətini
dünyasına satandır. Bundan da pisi axirətini başqasının dünyasına
satandır».
Burada ictimai münasibətlərin harmoniyasına xüsusi diqqət
yetirilib və hər bir problemin kökündə insanın özünü islah etmək
istəməmək niyyəti durur: «Güclü və qüdrətli o kəs deyil ki, xalqa
və insanlara qalib gələ. Həqiqətdə güclü (insan) və iqtidar sahibi o
kəsdir ki, öz nəfsinə qalib gələ».
Bəs elə isə bu böyük
etimadı doğrultmağa çalışaq, əziz Peyğəmbərimizə (s) layiqli ümmət
adlandırılmaq üçün səy edək. Bu böyük bayramımız müarək olsun! Allah
Təbarəkə və Təala cəmi ümmətə besət fəlsəfəsini dərk edib, bu bayramı
qəlbilə, əmməllərilə, düşüncə və niyyətləri ilə yaşatmağı nəsib etsin,
inşəallah!
Hacı İlqar İbrahimoğlu
İçərişəhər «Cümə» məscidinin imam-camaatı
DEYERLER.ORG
|
